BARO XIRFAD CUSUB

Dunidu maanta casribay noqotay (digital) waxwalba waxaa ay noqdeen fudayd waxbarashadii, cilmigii, aqoontii, ganacsigii, xirfadihii iyo waxwalba oo maankaaga kusoo dhaca naftaaduna jeclaysato waxay isku badashay duni qofwalba si fudud ku horumarin karo noloshiisa.

Halkan waxaan kugula wadaagayaa waxa ugu wanaagsan ugu fudud uguna koritaanka badani in uu yahay xirfada, xirfadu noocay doonto ha ahaato mida aad barataaba waxay noqon doontaa dhaxal aad adigu iska leedahay dunidana meeshaad doonto wax kaga cuni karto, sidoo kalena aad kaga shaqaysan karto. Maanta inaad xirfad cusub barataa way sahlantahay wayna fududahay, xirfadaha ayaa sii kala duwan qaar ku shaqayntooda ayaa adag qaarna ku shaqayntooda ayaa fudud, inaad makaanik, gaadhi maydhe, guri dhise, laydhle i.w.m noqotaa way adagtahay ku shaqayntoodu sikastoo aad lacag uga faa'idayso hadana waa inaad xoogaaga ku shaqayso. Sidookale inaad graphic designer, web developer, online marketer, video editor i.w.m noqotaa way fududahay ku shaqayntoodu xoog kuma shaqaynaysid ee maskaxdaada ayaad ku shaqaynaysaa. Hadaba wakhtigan casriga ah way fududahay inaad shaqooyinkan maskaxda u baahan barataa, online ayaad ku baran kartaa, courses gaagaaban ayaad ku baran kartaa, college offline ah waad ku baran kartaa iyadoo mudo gaaban lagugu barayo, sidookale iyadoon cidi ku barin waad is bari kartaa adigu adigoo adeegsanaya computer kaaga ama mobilkaaga iyo internet.

Hadaba xirfadahan digital ka ah waxay kaaga baahanyihiin kaliya inaad wakhti galiso sidookale aad barato xirfada aad ku wanaagsantahay ee aad horumar ka gaadhi karto, haddii aad isku qasabto wax aanay naftaadu jeclayn oo aanay raaxo ku dareemayn meel fiican kama gaadhaysid sidookale ha u baran hebel/hebla ayaa bartay ana waan baranayaa ee markasta xooga saar waxa aad ku wanaagsantahay ee aad si xiiso leh ugu shaqayn karayso, sidookale iska ilaali xamaasada maalmaha ama bilaha ah ee kadib marka ay kaa baxdo aad joojinayso waxaad baranaysay dadku waxa ay u badanyihiin qaar hiyi kaca ama xamaasad daran ay qaado marka looga sheekeeyo ama ay arkaan cid baratay oo horumar ka gaadhay xirfadaha qaar ama wax aysan aqoonin. Isku day inaad xooga saarto hal xirfad oo kaliya midaas marka aad horumar ka gaadho isku day kuwa kale waad baran kartaa xirfado kala duwan tusaale ahaan haddii aad barato naqshadaynta(graphic design) way fududahay inaad barato muuqaal hagaajinta(video editing) sidookale way fududahay inaad barato sawir qaadista(photography) tusaale kale hadii aad barato rinjiyaynta(painting) way fududahay inaad barato guri qurxinta(home decoration) sidookale way fududahay inaad barato faarada(furniture).

Talooyinkan iyo tusaale yaashani waxay kaa caawinayaan inaad barato xirfad cusub iyo qaabka aad u baran karto iyadoo noocyo kala duwan leh, waxaan kugula talinayaa inaad barato xirfad aad ku wanaagsantahay oo aad midho dhal ka gaadhi karto waxaan hubaa xirfadaas markaad ku shaqo tagto inaan lagu waydiin doonin shahaado jaamacadeed, shahaado iskuul, qabiil, reernimo i.w.m oo waxaa aad ku shaqaynaysaa(xirfadaasi) ay masuul kaa noqon doonaan dadkuna kugu dooran doonaan, kaliya waxaa lagaa rabaa inaad shaqadaada iyo waxqabadkaaga wanaajiso si dhamaystirana ugasoo baxdo masuuliyada laguu igmaday noocay doonto ha ahaato. Ugu danbayn haddii aad rabto inaad heersare ka gaadho xirfadaada iyo aqoontaada haku raadin lacag ama dhaqaale kaliya ee markasta xasuusnow inaad wax cusub kasii barato waxa aad taqaan tusaale ahaan haddii aad hesho shaqo lacag yar lagu shaqaynayo balse ah xirfada aad taqaano ee aad ku wanaagsantahay ha uga tagin lacagtaas yar ee dooro oo ku shaqee sababtoo ah shaqadan waxa aad ku helaysaa aqoon mida aad taqaan kasii badan sidookalena shaqo tan kasii wanaagsan sababtoo ah albaaba albaab ayuu sii furaa, iskuday waxa aad taqaan inaad tabobar(training) ku qaadato marwalba adoon lacagta eegayn waxaan hubaa inaad horumar aad u wayn ka gaadhi doonto.

Barkhad Hassan

Graphic Designer