DAREEN & DURUUF

Qoomamo iyo ciil walbahaar aan kala go' lahayn, cunto la'aan gaajo fikir saameeyay muuqayga qofwalba oo dhankayga Soo jaleecaana dareemayo inay dhibaato i haysato.

Shan maalin kadib ayaan kasoo baxay qol haddii aad gasho aadba u malaynayso inay reer ubad badan lihi deganaayeen, waa subax hore dadku shaqooyin ayay kusii wada kalahayaan qaar gaadiid ayay wataan qaar kalena lugtooda ayay maalayaan balse anigu si xoog badan ayaan u talaabaynayaa, isla subaxdan aan ku suganahay waxaa la iisoo sheegay in shaqo la ii helay waxaan aad ugu hamuun qabaa inay is badasho noloshaydu qof shaqaysta oo horumar gaadha inaan noqdo ayaan aad ugu han waynahay.

Waxa isii sugayay saaxiibkay haaruun oo isoo war galiyay shaqadan saaka la iigu yeedhay.

Salaan iyo bariido kadib waxaa la iisoo bandhigay shaqadu nooca ay tahay run ahaantii maan doonayn shaqo noocana balse maadaama aan bilaa camal ahay maalmo noloshayda ku qadhaadhaana aan soo maray waxaan ku qancay inaan shaqaysto naftaydana ku qanciyo inaan wax soosaar sameeyo.

Waa geerash lagaga shaqeeyo baabuurta xumaada, cillad gasho, iyo furfuristoodaba waxaan noqday gacanyare, saaxiibkay haaruun isaguna wuxuu igu qanciyay inaan dulqaato intaan shaqada la qabsanayo maadaama aan ku cusubahay shaqada iyo goobtaba.

Waan shaqeeyay maalintaa waxayna dhamaatay anigoo daallan oo dhididsan waxaase aan helay nolol maalmeed aan isku maareeyo iyo jeebkayga oo lacag la'aantii kasoo kabanaya

Si nabad ah ayaan kusoo hoyday anigoo suuqana soo maray qolkiibaan habeenkan kusoo laabtay anigoo sidii dhaama qof hagaagsana ah waxaan bilaabay inaan qolkii kala hagaajiyo maadaama uu yahay sidii aan saaka kaga tagay, nasasho kadib waxaan damcay hooyaday inaan war galiyo shaqada aan helay balse maba haysto taleefan aan ka waco qolkayga waxaa yaala telifishan aan habeenkii iskaga madadaasho waxaanse aad uga xumaaday inan hooyaday usheegin shaqadan aan helay.

Sidii ii caadada ahayd subaxdii hore ayaan ka toosay maadaama aan shaqo haysto imika, saaka waxaa isoo maray saaxiibkay haaruun waxaanu isku raacnay shaqadii intii aanu jidka kusii jirnay waanu sii wada sheekaysanay anakoo falanqayn noloshan aan ku suganahay ku saabsan wadna ayaanu gaadhnay goobtii shaqada.

Maalintani waa ay ka duwanayd maalintii hore abbaaro tobankii subaxnimo cadceeduna aad u kulushahay shaqaduna ay socoto waxaa garaashka soo galay baabuur ay darwal ka tahay gabar daymadii koowaad ee aan dhaayaha qac ku siiyay aan ku dhawaaday khalkhal iyo wareer dhalaalka iyo quruxda kasoo muuqda aawadood anigu waxaan ahay wada wasakh iyo boodh maadaama aan baabuurta hoos jiifay kuna mashquulsanaa hagaajintooda, gabadhii waxay baabuurkeedii soo dhigtay qaybta aan shaqada ka hayay ilaa haatanna waan sii eegayaa, Waxaan isku qanciyay in aanan isku mashquulin waxaan dantayda ahayn shaqadaydii ayaan iska sii watay waanan kasii jeestay daqiiqado badan iyagoon kasoo wareegin eegmadii laabtayda cushay waxaan ka war helay dhawaqa wicitaanka adero muuse oo ah ninka garaashka iska leh

"barkhadow kaalay adeer inantan u eeg baabuurka" degdeg ayaan ugasoo hoos booday baabuurkii aan hoos jiifay anoo wada boodha wada saliida "haye adeero anaa eegaya cilladiisa" waxaan ugu war celiyay hadalkii adero muuse waxaanan u dhaqaaqay dhinacii baabuurka inantu iga yaalay "hoo furahana walal hadhawbaan soo laabanayaa" waxaa hadalkan igu tidhi xamda oo ah inanta baabuurka iska leh "haye walal waxan rajayanayaa inaan cilladiisa ogaado" xamda ayaan ugu war caliyay kadibna hawshaydii ayaan iskasii bilawday, hawshii iyo shaqadii oo igu dheeratay jawiguna kulayl yahay waxaan aaday hadhka si aan u nasto waxaan adero muuse ka codsaday inu taleefonkiisa ii dhiibo si aan hooyaday u waco oo ilaa haatan aanan u sheegin inaan shaqo helay, hooyaday ayaanu is xaal waraysanay waanay ku faraxday inaan shaqo helay waanay ii ducaysay ana dareen farxadeed ayuu jawigaygu isku badalay maadaama aan hooyaday codkeeda iyo ducadeedaba ka bogtay.

Waxaan sugayaa goorta ay xamda soo doonan doonto baabuurkeeda waxaa igusoo noqnoqonaya foolkeedii ashqaraarka ahaa, hadalkeegii hawraarta wacnaa dhaqaaq joogsigii isku dheeliga tirnaa waxay naftu jeclaysanaysaa inaanay maalintani dhamaan sidoo kalena habeenku soo gelin waxaan dhibsanayaa inaan qolkii ku laabto caawa anoo laxawga dareen la ciishoonaya casar liiq ayay gaadhay cadceedu inay godkeedii kusii hoyoto doonayso abbaaro kadib waxaaa albaabka garaashka kasoo gashay xamda oo laafyoonaysa quruxda iyo carafta waxaad moodaa xuural cayn janadii kasoo anbatay aniguse waxaan ahay mid shaqadiisu foolxumaysay sidiibaan weli dharkii shaqada u xidhanahay "walaal baabuurkaygii ayaan u baahanahay ma baadhay cilladiisii" waxaa erayadan kasoo yeedheen xamda oo hortayda soo istaagtay "haa walal waan kuu dhameeyay waakan furihii" xamda ayaan ugu war celiyay anoon dhaayaha ka buuxan karayn ileen nin dhinbiil gudihiisa ka shidantay baan ahee "walal aadbaad u mahadsantahay lanbar aan lacagta ku diro iisheeg intay tahayna iisheeg" adeer muuse oo hadalkan xamda maqlay ayaa gudaha kasoo baxay "adeer lanbarkaa gaaban ku dir lacagta" adeer muuse ayaa u sheegay qiimihii waanay dirtay"adeer ninkan barkhad baa la yidhaa waa nin gacantiisa lagu kalsoonyahay baabuurka uu mar hagaajiyo mardanbe ma xumaado" hadalkan ayuu adeer muuse isagoo i faaninaya si kaftan ahaan ugu tuuray xamda "hhhh adeer aadbaad u mahadsantihiin halkan ayaan iman doonaa markastoon cillad ka dareeno" xamda ayaa hadalkan ugu war celisay adeer muuse iyadoo dhoola cadayn iyo qosol dabno kala qaada ku ladhay hadalkeedii waxaa isoo jiitay bishimaha quruxda leh ilkaha casaanka ah hadalkeedii wuxuu igu noqday mid aan maskaxdayda ka maydhmayn maalintanina sidaasay ku dhamaatay waxaanan lasoo hoyday laxaw caashaq oon dawo loo hayn qolkii ayaan caawa imid anoo daalan sariirta ayaan isku dul tuuray sidii qof lasoo dilay oo hoos u oynaya.

Barkhadhassan

June 24 2021