Bulshada iyo dadyawga ku nool koonkan waa ay is bartaan waxaanay sameeyaan xidhiidho kala duwan sida Saaxiibtinimada, Jacaylka iyo Xidhiidhada danaha nololeed sidiisaba xidhiidh kastaaba waxa uu u baahanyahay "Isfaham" xeel dheer oo ay labada qof kuwada jaanqaadi karaan kuna meel marin karaan xidhiidhkooda, iyada oo ay sidaa tahay hadana waxaa jira dad gooniya oo la iskugu talogalay in ay is fahmaan kuna rafiiqaan nolosha dadkaasna waxaa la helaa oo kaliya wakhtiyo gooni ah tani waxa ay muujinaysaa in isfaham la'aantu burburiso xidhiidhada noockastaba ha ahaadeene.
Xidhiidhka jacaylku waa midka ugu mudan in uu helo laba is fahmaya islana jaanqaadi kara xaalad walba oo ka hortimaadana ku wajihi kara wadajir iyo is aaminsanaan, haddiiba taasi rumowdo waxaa hubaal ah in ay wadajir ahaanayaan noloshooda inta ka dhiman kuna wada noolaanayaan isfaham, kalgacayl iyo xiise joogto ah waana kuwa inta badan ku guulaysta ka midho dhalinta riyadooda jacayl gaadhsiiyana heer qoys ay yageleelaan.
Haddaba dareenka waxaa loo gooni yeelay in ay fahmi karaan oo kaliya shakhsiyaad kooban oo ay aragtidooda noloshu xeel dheertahay waana kuwa marwalba ilaaliya dareenka, shucuurta iyo caadifada qofka ay xidhiidh nololeed la sameeyaan waxaana hela uun qof isla sidaas u fahma dareenka, kuwa inta badan ku guuldarraysta xidhiidhada jacayl waxaa 99% sabab u noqda in uu xidhiidh kaasi burburo isfaham la'aanta dhexdooda timaad iyo in ayna tixgalin siinin fahmida aamusnaanta iyo dareenka ruuxda waxaana ay si fudud u dhaawacaan qalbiyada.
Taas badalkeedana kuwa isfahamka u khaaska ah ma helaan inta badan noloshooda kuwo fahma dareenkooda sidookalena akhrisan kara indhahoodu dareenka ay gudbinayaan iyo ruuxdoodu waxa ay tebayso waxa ayna ku dhamaystaan nolosha kelinimo kuwo kooban oo helay kuwo ku haboon mooyaane.
Dadka inta badan wax qora, wax akhriya waxna curiyaa waa kuwo kaga xeeldheer isfahamka kuwa aan intaa midna lahayn, sidookale kuwa nolosha adag, duruufaha iyo marxaladaha kala duwan ee nolosha waayo-aragnimo ka dhaxlaa waa ay ka isfaham sarreeyaan kuwa noloshoodu heerarka sare iyo dhexe tahay ee aan duruuf iyo qalafsanaan soo arag.
Haddaba ragga iyo haweenka midka fahamka ruuxiga ah u baahani waa haweenka sababtoo ah 80% waa ay qariyaan dareenkooda iyo waxa ay ruuxdooda iyo qalbigoodu tebayo waxa ayna mudan yihiin in ay helaan qof dareenkooda iyo aamusnaantooda fahma xaalad walbana kula jaanqaadi kara, waana ay ka qalbi jilcanyihiin ragga waana ay uga nugulyihiin jacaylka waana sababta inta badan ay u dhaawacmaan qalbiyadoodu una cidleeyaan kuwii ku abuuray dareenka jacayl, xaaladaasi marka ay timaadana waa ay ka samraan nin ay nolosha la wadaagaan oo ragga oo dhammi iskugu mid ayay u noqdaan ilaa ay ka helayaan qof fahmaya dareenkooda umana dhaqaaqaan in ay marlabaad xidhiidh jacayl sameeyaan xataa iyaga oo u baahan wehel iyo qof dhaawaca ka dhaya hadana waxa ay doorbidaan in ay qarsadaan dareenkooda, halka ninka ragga ahi marka qalbiga laga dhaawaco uu isla markaaba baadi goobo midkale oo uu xidhiidh la wadaago si uu u iloobo burburkii ku yimid xidhiidhkii hore iyo saamayntii ui kaga tagay.
28 Oct 2022
Barkhad Hassan
Woow 💐
ReplyDelete