Noloshu waa sida bad-waynta oo kale waxa ay leedahay mawjado dhirbaaxo daran wakhtiyada qaarna aad ku hafanayso, ka dabaalashadeeda iyo ka gudbida mawjadahaa waawayn waxa ay u baahanyihiin geesinimo iyo dhabar adayg haddii aad is dhigato oo aadan ku dhiirrana waa ay kula degaysaa haddiiba aad quustana waa ay adagtahay sida aad uga baxayso, tani waxa ay la macno tahay noloshan aynu ku noolnahay ee inagu qaabilaysa wejiyo kala duwan iyo duruufaha qalafsan ee qofka aan ildheer u lahayn xeeshiisuna yartahay judhaba quus soo istaajinaysa isuna arkayo in uu yahay mid guuldarraystay oo aanay fursado kale u hadhin.
Waxaa jira laba dariiq uun oo nolosha loo hab-raaco waa midka koowaade waa dariiqa Allah (swt) kuu jeexay oo diin iyo yaqiin ku dhisan loona baahanyahay in aad noloshaada ku dabaqdo haddii aad ka leexatana aad waayayso dariiqii kale isla markaana aad ku dhex anbanayso bad-waynta nolosha, waa midka labaade waa kan aad adigu jeexatay una soo bandhigaya bulshada iyo adduunkaba in aad qof jira tahay, dariiqani waa ka aad ku jaangoynayso ahdaafta iyo qorsheyaasha aad nolosha ka leedahay una halgamayso haddii ay shaqo noqoto iyo haddii ay ganacsi iyo waxbarasho noqotaba.
Labadan dariiq haddii aad ka weecato waxaa ku liqaysa oo aad quusaysaa bad-waynta nolosha wayna adagtahay kasoo kabashadeedu, haddii aynu macne kale u samayno si aad u fahamto waxa ay noqonaysaa in aad qaadato magaca ah "Hebel nolosha ayuu ka dhacay" tanina waxa ay xaqiijinaysaa haddii qofku garan waayo ujeedooyinka iyo mabaa dii'da uu u noolyahay in uu ku dhex anbaday nolosha kuna haftay mawjadaha waawayn ee ay ku qaabishay.
Haddaba si aad ugu noolaato nolol qiimo badan una ahaato qof jira waa in aad mabd'a iyo ujeedo cad lahaato sidookalena waa in ay kuu qorshaysnaadaan dariiqooyinka aad marayso iyo halka aad rabto in aad ka gaadho nolosha inta ay naftu kugu baaqiga tahay, jalaafooyinka iyo jidadka qodxaha badan ee ay leedahay noloshu waa ay kuu horseedi karaan guuldarro, niyad jab iyo murugo se waa in aad marnaba is dhiibin oo aad cashar ka barataa marxalad walba oo aad marto.
Wakhtiyada qaar waxaa dhici karta in ay guuldarradaada sabab u noqdaan bulshada iyo dadka aad la nooshahay hadaladooda iyo hab dhaqankooduna ku marin habaabiyo taasina looma baahna in aad dheg jalaq u siiso ee waa in aad marwalba hore uga socoto diiraddana aad saarto hadafkaaga iyo ujeedada geedigaagu u raran yahay, waxaa kale oo badanka dhacda in ay caadooyinka xun-xuni ku dabraan oo aad u hogaansanto dareenadaada taasina ay sababto in aad quusto bad-waynta nolosha.
Gunta iyo gaba-gabadu waa in aanad ka dhicin doonta nolosha si aad uga badbaado ugana gudubto bad-waynta nolosha.
Barkhad Hassan
Nov 4 2022
Comments
Post a Comment